പഴയങ്ങാടി: ചെറുകുന്ന് പള്ളിച്ചാലിൽ ട്രെയിൻതട്ടി വിദ്യാർഥി മരിച്ചു. കട്ടക്കുളത്തെ കല്ലക്കുടിയൻ അനീഷ്-ഷീജ ദമ്പതികളുടെ മകൻ ഫെലിൻ ഫെഡറിക്ക് (16) ആണ് മരിച്ചത്. കണ്ണപുരം പോലീസ് സ്റ്റേഷനു സമീപം ശനിയാഴ്ച രാത്രി 10.40 ഓടെയായിരുന്നു സംഭവം.
സമീപത്തെ ക്ലബിന്റെ ആഘോഷവുമായി ബന്ധപ്പെട്ട് നടക്കുന്ന കലാപരിപാടികൾ കണ്ട് സുഹൃത്തുക്കളോടൊപ്പം മടങ്ങുകയായിരുന്ന ഫെലിൻ ഫെഡറിക്കിനെ മംഗളൂരു ഭാഗത്തേക്ക് പോകുകയായിരുന്ന വന്ദേ ഭാരത് എക്സ്പ്രസ് ഇടിക്കുകയായിരുന്നു.ചെറുകുന്ന് മുണ്ടപ്രം ഗവ. വെൽഫെയർ ഹയർ സെക്കൻഡറി സ്കൂളിൽ പത്താം ക്ലാസ് പരീക്ഷ എഴുതി റിസൽട്ട് കാത്തിരിക്കുകയായിരുന്നു. കണ്ണപുരം പോലീസ് ഇൻക്വസ്റ്റ് നടത്തിയ മൃതദേഹം പരിയാരത്തെ കണ്ണൂർ ഗവ. മെഡിക്കൽ കോളജിൽ പോസ്റ്റുമോർട്ടത്തിനുശേഷം ബന്ധുക്കൾ ഏറ്റുവാങ്ങി കട്ടക്കുളം സെന്റ് ജോസഫ് പള്ളിയിൽ സംസ്കരിച്ചു. സഹോദരൻ: ഫാബിയോ.